Mae Cyngor Sir Fynwy wedi ymuno â Sustrans Cymru i ddod â'r prosiect benthyca e-feiciau llwyddiannus, E-Symud, i'r Fenni. Yn wreiddiol, prosiect peilot gan Lywodraeth Cymru a gyflwynwyd ledled Cymru, bydd trigolion y Fenni nawr yn gallu benthyg e-feic neu e-feic cargo am ddim fel y gallant brofi'r buddion drostynt eu hunain.
Gall defnyddio e-feic helpu arbed arian ar danwydd, cael ymarfer corff, teithio ymhellach, a delio â bryniau Cymru. Credyd: photojB\Sustrans.
Yn dilyn ymlaen o lwyddiannau cyflwyno E-Symud ledled Cymru, lansiwyd prosiect benthyca e-feiciau Sustrans Cymru yn Y Fenni.
Nod y prosiect E-Symud, sy'n cael ei ariannu gan Gyngor Sir Fynwy drwy Gronfa Teithio Llesol Llywodraeth Cymru, yw gwneud e-feiciau a beiciau e-gargo yn fwy hygyrch i bobl ledled Cymru, gan ddangos eu hyfywedd fel dull gwirioneddol o drafnidiaeth gynaliadwy.
Wrth siarad am lansiad y prosiect E-Symud yn y Fenni, dywedodd yr Aelod Cabinet dros Newid Hinsawdd a'r Amgylchedd Cyngor Sir Fynwy, y Cynghorydd Catrin Maby:
"Mae'r prosiect E-Symud yn enghraifft wych o sut y gall gweithio mewn partneriaethau wneud teithio llesol yn fwy hygyrch i'n trigolion.
"Mae'n wych gweithio gyda Sustrans Cymru i ddarparu e-feiciau i drigolion eu benthyca."
Fel rhan o'r prosiect, bydd trigolion Y Fenni yn gallu benthyg e-feic neu e-feic cargo, gyda'r ddau fath ar gael am gyfnod benthyciad pedair wythnos, am ddim.
Gall busnesau a sefydliadau lleol fenthyca naill ai e-feic neu e-feic cargo am ddim am 12 wythnos.
Gall trigolion, busnesau a sefydliadau lleol y Fenni fenthyca e-feic neu e- feic cargo am ddim. Credyd: photojB\Sustrans.
Dod â manteision teithio ar e-feiciau i'r Fenni
Wrth siarad am E-Symud yn dod i'r Fenni, dywedodd Charlie Gordon, Cydlynydd Prosiect Sustrans Cymru:
"Rydym yn gyffrous i fod yn gweithio gyda Chyngor Sir Fynwy i ddod ag E-Symud i'r Fenni, ac i bobl gael cyfle i ddefnyddio e-feic eu hunain am ddim.
"Mae llwyth o fanteision i reidio e-feic - chi'n arbed arian ar danwydd, chi'n cael ymarfer corff, chi'n gallu teithio ymhellach nag ar feic gwthio safonol, maen nhw'n gwneud reidio lan bryniau yn haws - ac mae E-Symud yn galluogi pobl i brofi'r pethau positif yna drostyn nhw eu hunain, am ddim.
"Mae'r prosiect yn agored i bawb sy'n byw yn ardal y Fenni, felly byddem yn annog pobl i gysylltu i gofrestru eu diddordeb."
Ar ôl ei ail flwyddyn o gyflenwi ar draws rhannau eraill o Gymru, dywedodd 76% o fuddiolwyr E-Symud eu bod wedi cael effaith gadarnhaol ar eu hiechyd a nododd 79% eu bod yn cael effeithiau cadarnhaol ar eu lles o ganlyniad i ddefnyddio e-feic.
Dywedodd pobl eu bod yn teimlo bod eu ffitrwydd wedi gwella, eu bod yn profi llai o unigedd, a'u bod yn teimlo'n fwy annibynnol o fod wedi benthyca e-feic.
Gwelodd busnesau a sefydliadau sy'n benthyca beiciau e-cargo eu teithiau car a fan wythnosol yn gostwng 62%, ac fe wnaethant nodi llai o gostau teithio ac amseroedd teithio cyflymach.
Am fwy o wybodaeth am y prosiect neu i drafod benthyca e-feic, cysylltwch â Rodri Guimerà Zarranz ar rodri.gz@sustrans.org.uk.
