Rydyn ni wedi lansio Rhannu, Parch, Mwynhau - ymgyrch ddigidol newydd gyda'r nod o annog pobl i fod yn fwy ystyriol o ddefnyddwyr eraill ar y Rhwydwaith Beicio Cenedlaethol yn ystod pandemig Covid-19.
Wrth i gyfyngiadau Covid-19 ddechrau codi o amgylch y DU, mae llwybrau di-draffig ar y Rhwydwaith Beicio Cenedlaethol yn helpu pobl i gerdded a beicio.
Mae teithiau'n cael eu gwneud ar y Rhwydwaith ar gyfer teithiau hanfodol, i wneud ymarfer corff yn rheolaidd, ac i fwynhau treulio amser yn yr awyr agored.
Yn ystod y cyfnod hwn, rydym am i bawb allu parhau i ddefnyddio'r Rhwydwaith a mwynhau popeth sydd ganddo i'w gynnig wrth gadw'n ddiogel ac yn unol â chanllawiau cyfredol y Llywodraeth.
Y cyngor presennol yw cyfyngu ar eich cyswllt ag eraill a chadw o leiaf dau fetr ar wahân i unrhyw un nad ydynt yn eich cartref.
Felly, rydym yn galw ar holl ddefnyddwyr y Rhwydwaith i fod yn garedig, ystyriol a pharchus i'r llwybrau eu hunain ac eraill sy'n defnyddio'r gofod.
Mae hyn yn cynnwys aros yn lleol lle bo'n bosibl, cynllunio ymlaen llaw i osgoi ardaloedd poblogaidd a allai fod yn brysurach na'r arfer, a rhoi lle i ddefnyddwyr eraill fwynhau'r Rhwydwaith hefyd.
Dywedodd Xavier Brice, Prif Swyddog Gweithredol Sustrans:
"Mae'r Rhwydwaith Beicio Cenedlaethol wedi profi i fod yn adnodd lleol mor ddefnyddiol i bobl yn ystod y cyfnod hwn o ansicrwydd mawr.
"Er ein bod am i bawb barhau i archwilio'r llwybrau, sylweddolwn fod cyfuniad o dywydd da, yr awydd i fod y tu allan, a chynnydd yn nifer y bobl sy'n beicio, wedi arwain at sawl rhan o'r Rhwydwaith yn brysurach na'r arfer.
"Felly rydyn ni'n atgoffa pobl bod y Rhwydwaith yn lle sy'n cael ei rannu i bawb.
"Ac rydyn ni'n gofyn i bawb fod yn ystyriol o eraill wrth archwilio'r llwybrau fel y gallwn ni i gyd Rannu, Parchu, a Mwynhau'r awyr agored yn ddiogel."
